La siesta en bable

Esti añu, col agua y nublu que nos traxo'l graciosu branu, ye la cuenta pa disfrutar de la siesta que tanto nos gusta a los españoles y que nel periodu llaboral muitos nun pueden saboriar. Descansar dempués de comer ye una costume antigua (una bona costume) y ta abondo afitada en munchos llugares del planeta. La palabra vien de la espresión llatina «sexta hora», pa nomar esi curtiu periodu nel que'l calor aprieta y que coincide cola la dixestión de la xinta. Éntranos la modorra y necesitamos echar un pigazu. La siesta sírvenos pa cargar les piles de nuevo y emprender la tarea de la tarde con frescura y ánimu.

Ta demostrao que munchos accidentes de tráficu ya tamién llaborales coinciden nesti periodu postreru al mediudía, porque la somnolencia ye causa de falta d'atención; hai datos qu'apunten a que'l sueñu causa tantos accidentes como l'alcohol. La siesta ye reparadora, aumenta'l rendimientu llaboral, descarga l'ansiedá y desbloquea la mente. Dícennos los espertos que tampoco ye recomendable dormila munchu tiempu, nunca más de media hora.

Sin embargu, son pocos los privilexaos que, salvo nel periodu vacacional, pueden dormir la siesta a diario como ye recomendable. La vida moderna, enllena de prises y agobios, horarios interminables que cuasi nun dexen el tiempu necesariu pa comer, llévanos a nun proponenos nin siquiera echar una cabezadina al mediudía. Amás son munchos los trabayadores que tienen que xintar nel llugar de trabayu, o que disponen del tiempu xustu, calculáu pa soltar rápido'l platu y enfrentase de nuevu, ensin un respiru siquiera, la dura xornada de la tarde qu'inda los espera. Y esto pasa inclusive en trabayos d'altu riesgu. De xuru que'l rendimientu llaboral incrementaríase enforma si los empleaos tuvieren unos horarios más flexibles que-yos permitieren disfrutar d'esti relax: una siestina reparadora.

Nun ye sólo la falta de la siesta lo que repercute negativamente nel organismu de la población activa; los trastornos del sueñu son muncho frecuentes. Los estudiosos del sueñu alértennos de que dormir poco perxudica la salú y ye causa d'abondos trastornos físicos y psíquicos; enfermedaes como la diabetes, la gordura, pérdida de memoria, irritabilidá y estrés son malures producíes por dormir poco y mal. Piérdense defenses, arrúgase la piel y aviéyase'l cuerpu enantes de tiempu. Y ye claro que, mientres nel primer terciu del sieglu XX se dormíen nueve hores de permediu, agora, en plenu sieglu XXI, dormimos unes siete hores, eso los más afortunaos, porque los que trabayen a turnos, los que tienen llargos desplazamietos pa llegar al sitiu de trabayu y los que sufren otres circunstancies penoses pa llevar el pan a casa suelen dormir una media de cinco hores diaries.

Güei, amás de les hores de trabayu, les hores dedicaes al ociu tamién nos quiten tiempu de cama, vivimos la nueche, porque ye lo que ta de moda, y esto págase en hores de dormir. Tresnochar ye habitual, tanto de branu como d'iviernu, y si decidimos quedanos en casa, pa entretenenos sin dormir tamién tenemos la tele, que nos embabieca con programes basura en cincuenta mil canales; como si queremos tar tola nueche espiertos. Al día siguiente hai que dir a trabayar, colos güeyos bien abiertos y cola mente fresca pa emprender la dura xornada llaboral, y esto, anque se difunda la creencia de que'l cuerpu s'adapta a los nuevos ritmos de vida, tamos viendo que'l cansanciu acumúlase y que l'estrés afecta a un gran porcentaxe de xente de toles edaes. La falta d'hores de sueñu, el desorden nel dormir ye dalgo que trastorna l'organismu, y col descontrol que xenera ye difícil dempués volver a regulalu.

Conscientes de los problemes que nos trai'l dormir poco, hai tiempu yá que los empresarios de dalgunos países piensen en que los sos trabayadores tengan dempués de comer un periodu de descansu. ¿Cómo? ¿Ónde? Eso tendrán que discurrilo, igual que discurren toles formes de tener la xente atrapada mil hores nel trabayu con tal d'enriquecese en pocos años. Cuestión d'horarios. Empresarios ya instituciones tendríen que planificar otra forma de vida pa los sos empleaos ensin esprimilos con una xornada llaboral llarga, estresante y sin descansu, soportando tolos inconvenientes que de por sí yá tien cualquier trabayu.

Los espertos en temes de sueñu tán convencíos de que la siesta potencia la memoria, la concentración y l'atención, y permite aniciar nueves actividaes en meyores condiciones, más espiertos y relaxaos. Paez ser que yá hai empreses que determinaron incorporar a la so plantilla de trabayadores los beneficios de la siesta y pa ello adecentaron sales de descansu, con sillones cómodos pa que los sos empleaos puedan descansar unos minutos.

Pero, de momentu, tendremos que conformanos cola siesta estival, y más aprovechando estos díes buxos que tenemos. Y si por fin llega'l sol, hemos dormila debaxo d'una sombriya, nun vaya ser qu'espertemos coloraos como centollos.

María Esther García López